Mae Ysgol Nefyn yn gwasanaethu’r dref a’r ardal wledig gyfagos gyda phlant o bentrefi Pistyll, Llithfaen a Morfa Nefyn (ar ddechrau Blwyddyn 4) hefyd yn ei mynychu. Daw mwyafrif o’r disgyblion o gartrefi sy’n siarad Cymraeg ar yr aelwyd.

Cynhaliwyd arolygiad diweddaraf yr ysgol yn ystod Tymor y Pasg, 2003. Dyfynnir isod farn yr Arloygydd, Mr Meurig Thomas am yr ysgol:

“… Mae Ysgol Nefyn yn ysgol dda. Mae’n gymuned hynod o gartrefol a chynhaliol, gydag ymdeimlad o bwrpas yn nodweddiadol o’r holl weithgareddau. Ceir safonau da mewn mwyafrif pynciau’r CC ac mae cyfran helaeth o’r addysgu yn dda neu well…. Mae ansawdd yr ymddygiad ac ymagweddau yn dda iawn.”

Mae’r ysgol wedi buddsoddi’n helaeth yn y dechnoleg ddiweddaraf gyda Bwrdd Gwyn Rhyngweithiol ymhob dosbarth ac ystafell gyfrifadurol o ddeg cyfrifiadur a Bwrdd Gwyn.

Mae’r ysgol wedi cwblhau Cam 4 fel Ysgol Iach ac wedi llwyddo ynddo. Rydym hefyd wedi llwyddo i dderbyn y wobr aur fel Ysgol Werdd.

Dyma rai enghreifftiau o brif flaenoriaethau`r Ysgol :-

• Gwrando ar blant – Ysgol Gyfeillgar at Ddyslecsia
• Ymgyfarwyddo â`r Cyfnod Sylfaen a Chwricwlwm 2008
• Ymestyn plant galluog
• Asesu ar gyfer dysgu ymhob dosbarth
• Defnyddio`r amgylchfyd i gyfoethogi`r addysgu a`r dysgu
• Adnabod grwpiau targed

Mae’r Llywodraethwyr, staff a’r rhieni yn gefnogol dros ben i’r ysgol ac yn awyddus i’w gweld yn gwella ymhellach gan barhau yn rhan fyw o gymuned glos Nefyn a Phenllyn.